BATU RENGGANG

Ibas sada kuta, lit me sada keluarga. Keluarga enda eme Bapa ras Nande Bintang. Perbahan anakna sintua dilaki gelarna Bintang (umurna sekitar 10 thn). Anakna sipeduaken diberu (umurna 1 thn) gelarna Bulan.

Pendahin Bapa ras Nande bintang paksa sie seh kal meserana, nande bintang nuan-nuan kujuma, tambah-tambah sie Bapa Bintang dahinna erpola. Bintang enda seh kal gutulna, suruh sekolah mekisat, dahinna nebu-nebu nande bapana. Kai pindonna la tertogan.

Bas sadawari i dilo Nande Bintang me si Bintang nemani ia muat lau ku baluren la ndauh i kuta nari.
"Otak anakku temani aku muat lau kita" nina nandena.
Bagi si kisat me si Bintang, ngikuti nandena ku baluren, babana me kuran si enggo pultak pantilna. Seh bas ingan muat lau ndai, i isina me kuran ndai, la mbera dem.
Nande si Bintang tadingkenna me si Bintang i bas ingan muat lau ndai.
Reh nina, "nakku, isindu lau ena ya, aku ndaku ku kerangen kentisik, lit buatenku" nina erbelas.
Janah si Bintang ngisi lau ndai, perbahan la diatekenna kepeken kuran sinipakena kepeken pultak, je nari erbelas me si Bintang
"Mak mak, la dem dem" nina si Bintang.
Emaka reh nina nandena janahna erdalin,
"Demko... demko.. , ningen saja", nina nandena man Bintang.
Erjawab ka si Bintang, "la ia ngit mak" nina bintang mulihi.
"Belasken saja lalap, demko.. demko.. ningen nakku" nina nande Bintang enggo mulai bene-bene sorana i kerangen.

Jenari reh me ukur si Bitang ndarami nandena ku kerangen perbahan lanai i begina sora nandena.
"Mak mak", nina janahna tangis. Seh ikerangen reh me udan meder, ras kilap pe galang rikut ras lenggurna. Paksa reh kilat, lit cahayana, i idahna me buk bali ras buk nandena sangkut ibas deher buluh janah lit sora i begina.
"Gang... rak... gang... rak...gang... rak", reh gegehna reh dekahna.
Janah i begina me sora, "Ise daramendu kujenda" nina begina sora.
Reh nina si Bintang, "ndarami mamakku ateku, perbahan bapakku i rumah ras lit denga agingku kitik denga", nina si Bintang.
Emaka nina sora ndai, "Aku simada kerangen enda, nandendu enggo kupan, sebab asa kai anak-anak si gutul nandena kupan, kam pe ade gutul denga kupan" nina sora ndai.

Je maka enggo i idah bintang me dungna kai si ersora e, matana cahar kal, ipenna seh kal entelapna bagi singa, ras adi erdalan ia taneh epe ikut ergetar, janah lit sorana gang.... rak... gang.... rak... eme BATU RENGGANG.

Je nari Bintang pe ngaku salah, "lanai aku gutul nini" nina erbelas janahna tangis. Emaka erbelas me simada kerangen (BATU RENGANG), "to mulih kam, kelengi bapandu ras agindu, sebab nandendu enggo ibas beltekku" nina.
"Adi la kam gutul, dat kesangapen kam nggeluh, adi nandendu enggo bas beltekku" nina nini simada kerangen man Bintang. Tapi adi kam pe gutul denga, kam pe kupan ka bali ras nandendu nina Batu Renggang.

Emaka mulih me si Bintang kurumah. Mulih i kerangen nari, si Bintang tutus atena nggeluh i kelengina me bapa ras agina. Seh maka jore me geluhna ras bapa bagepe ras agina.

Enda me pesan moral cerita BATU RENGGANG

Turi-turin enda biasa i bereken man danak-danak, segelah ia ula gutul seh ngasa ia mbelin meteh tanggung jawabna nggeluh ibas keluarga bagekepe ibas sienterem, bujur ras mejuah juah.